ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានប្រាប់ប្រធានាធិបតីអ៊ុយក្រែន លោក ហ្ស៊ែលឡិនស្គី ថាកម្ពុជាគ្រោងនឹងបញ្ជូនអ្នកដោះមីនដើម្បីទៅជួយបណ្ដុះបណ្ដាលដល់ប្រទេសដែលកំពុងញ៉ាំញីជាមួយសង្គ្រាមមួយនេះ។ 

ក្នុងជំនួបតាមទូរស័ព្ទកាលពីថ្ងៃទី០១ ខែវិច្ឆិកា ម្សិលមិញ សម្ដេចតេជោ ហ៊ុន សែន បានលើកឡើងថា ដោយសហការជាមួយប្រទេសជប៉ុន កម្ពុជាត្រៀមខ្លួនជាស្រេចក្នុងការបញ្ជូនអ្នកដោះមីនរបស់កម្ពុជាទៅជួយបណ្តុះបណ្តាលដល់អ្នកដោះមីនរបស់អ៊ុយក្រែន តាមពេលវេលាសមស្រប។

លោកប្រធានាធិបតី ហ្ស៊ែលឡិនស្គី បានថ្លែងអំណរគុណ និងស្វាគមន៍ចំពោះកម្ពុជាដែលមានបំណងផ្តល់ជំនួយខាងដោះមីននេះ។

ជាប្រទេសធ្លាប់ឆ្លងកាត់សង្គ្រាមជាច្រើនទស្សវត្ស បច្ចុប្បន្នអាចចាត់ជាប្រទេសមួយដែលមានជំនាញក្នុងការដោះមីននិងគ្រាប់មិនទាន់ផ្ទុះ។ កម្ពុជាគ្រោងលុបបំបាត់មីនឲ្យអស់ក្នុងឆ្នាំ២០២៥ ផងដែរ៕ 

^{PHOTO: KOK KY}